Հարգելի գործընկերներ,

Հայաստանի հաշվապահների և աուդիտորների ասոցիացիայի 2012թ. մայիսի 12-ին կայացած ժողովի արդյունքում ընտրված ՀՀԱԱ խորհուրդի առաջին  կարևորագույն քայլը եղավ ՀՀԱԱ առաքելության սահմանումը: Սահմանվեց, որ Հայաստանի հաշվապահների և աուդիտորների ասոցիացիան մասնագիտական մարմին է, որի առաքելությունն է խրախուսել Հայաստանում գործող կազմակերպությունների ֆինանսական տեղեկատվության վստահելիությունը օգտագործողների, այդ թվում` նաև ներդրողների աչքում: Առաքելությունն իրագործելու նպատակով ՀՀԱԱ խորհուրդը   մանրամասն և բովանդակալից քննարկումներից հետո մշակեց ու հաստատեց ՀՀԱԱ 2012-14թթ. Զարգացման ծրագիրը` նշելով, որ ասոցիացիան  ձգտում է կատարելագործել ՀՀ-ում գործող հաշվապահների և աուդիտորների մասնագիտական կարողությունները` որակավորման, շարունակական կրթության, համապարփակ մասնագիտական օժանդակության և որակի հսկողության միջոցով, ինչպես նաև հաշվապահության և աուդիտի պատվիրատուների հետ մշտական փոխադարձ կապի միջոցով:

Զարգացման ծրագրով սահմանվեցին մի շարք կարևորագույն նպատակներ.

1. Աուդիտորական գործունեության որակի մոնիտորինգ,
2. Մասնագիտական որակավորում,
3. Հանրային հատվածի հաշվապահության և աուդիտի գործառույթ և որակավորում,
4. Աուդիտի միջազգային ստանդարտների, արժանահավատության այլ ստանդարտների, վարքագրքի, ֆինանսական հաշվետվությունների միջազգային ստանդարտների, հանրային հատվածի հաշվապահական միջազգային ստանդարտների շարունակաբար թարմացում և իրազեկում,
5.  ՀՀԱԱ ինստիտուցիոնալ հզորացում:

Նպատակների իրագործման հետևողականությունը ապահովվեց հաստատված գործողությունների ծրագրով, որի նպատակն է մի կողմից ապահովել ասոցիացիայի ընթացիկ բնականոն գործունեությունը, մյուս կողմից ստեղծել ամուր հիմքեր հետագա կայուն զարգացման համար: Արդյունքում, չնայած դժվարությունների, իրականացվեցին բազմաթիվ միջոցառումներ, որոնք ապահովեցին հաջողություն աուդիտի որակի մոնիտորինգի, որակավորման ապահովման, ինստիտուցիոնալ հզորացման և այլ ուղղություններով: Արդյունքները նրկայացված են համապատասխան հաշվետվությունում:

2014թ. մայիսի 17-ին կայանալիք ժողովի արդյունքում ընտրվել է ՀՀԱԱ նոր խորհուրդ:

Մեր գործընկերներին` ՀՀԱԱ խորհրդի նոր անդամներին, մաղթում ենք արգասաբեր և արդյունավետ աշխատանք: Համոզված ենք, որ չկա որևէ խնդիր, որը պրոֆեսիոնալները չկարողանան լուծել համատեղ ջանքերով: Համոզված ենք նաև, որ ՀՀԱԱ նոր խորհուրդը արդյունավետորեն լուծելու է առաջացող խնդիրները և միևնույն ժամանակ ակնկալում ենք, որ վերը ներկայացված ՀՀԱԱ գործունեության հիմնական ուղղությունները շարունակաբար զարգացվելու են: 

Այս վերջին ասածի իմաստով պետք է հաշվի առնել հետևյալը. ՀՀ ազգային ժողովում մեր մասնագիտական երկու հիմնարար օրենքների նախագծեր կան, այլոք քննարկվում են ՀՀ կառավարության ներկայացմամբ: Միջազգային կազմակերպությունների օգնությամբ մշակվում է նոր հայեցակարգ: Խորհրդի օրակարգում է լինելու Մասնագիտական կառույցի ստեղծման քննարկումը կարգավորող պետական մարմնի հետ, ինչպես նաև Հաշվապահների միջազգային դաշնության հետ հարաբերությունների հետագա խորացումը, հաշվապահների ու աուդիտորների որակավորման համակարգի հետագա ամրապնդումը և Աուդիտի որակի մոնիթորինգի նախաձեռնության խորացումը:

Նախապես շնորհավորելով ՀՀԱԱ խորհրդի նոր անդամներին և նախագահին իրականում շատ պատասխանատու, բայց պատվաբեր աշխատանքը ստանձնելու համար, մաղթում ենք հաջողություն և ամենայն բարիք` ի շահ մասնագիտության զարգացման: 

ՀՀԱԱ խորհուրդ

06 մայիսի 2014թ.

(Արձանագրություն, 06.05.2014թ.)